Fransa mehakiminde ehl-i hibre – Sadakat-i zevciye ve münasebat-ı gayr-ı meşrua.

Mehakimce temin-i adalet kaziye-i mutenasında vücudu elzem olan ehl-i hibre mesele-i mühimmesi Fransa’da ahiren tahaddüs eden bazı deavi-i cezaiye münasebetiyle hukuk-şinasan tarafından pek çok mevzubahis olmaktadır. Kanuni ve tıbbi ehl-i hibrenin hâlihazırdaki nekayıs-ı teşkilatını beyanda Fransa mahkeme-i temyizi, hükkâm, meşahir-i etibba hep müttefiktirler. Şu hâlde onu ıslaha çalışmak tabiidir; fakat nasıl?..

Bir kere şimdiki ehl-i hibreye karşı serd olunan itirazat ne gibi şeylerdir? Evvelemirde bu ciheti tetkik etmeli.

Ezmine-i kadimeye doğru irca-i nazar edecek olursak erkân-ı mehakim arasında asıl hibreye tesadüf edemeyiz; müttehim tarafından, aleyhine istinat olunan cürmün temyiz-i mahiyet-i hakikati fennî ve sınaî bazı malumata tevakkuf ettiği beyanıyla erbabından bir iki kişinin huzur-ı mahkemede istimaı yolundaki iddia bir hande-i istihfaf ile istikbal edilirdi.

(…)

-İstanbul: 17 Ağustos 1317-