Tercüman-ı Hakikat refik-i muhteremimizle müştereken tab olunduğu ilan edilen nüsha-i musavvere-i fevkalade ve yegâne işbu Cumartesi günü meydan-ı intişara vaz olunacaktır. Nüsha-i mezkurenin kısm-ı siyasimizde münderiç fihristi mütalaasından anlaşılacağı üzere Girit muhtacin-i İslamiyesi menafini temin maksadıyla teşebbüs olunan işbu emr-i hayr sayesinde meydana gayet güzel bir meşher-i asar-ı Osmaniye gelmiştir ki, matbaa-i acizanemiz tarafından ilave kılınan ve 26 kıta tasviri havi bulunan albüm dahi eserin ehemmiyetini tezyin eylemektedir.

Nüsha-i fevkaladeye intişardan akdem lütfen yazılmış olan zevat-ı kirama Cumartesi günü kitaplar tevzi ve irsal kılınacaktır. Bundan sonra iştirasını arzu buyuran zevat-ı kiramın idarehanemize yahut Tercüman-ı Hakikat matbuasına müracaatı lazım gelir.

Nüshalar, kâğıtlarının ve suret-i tablarının cinsine göre on ve yirmi ve kırk kuruşluk olup vilayat-ı şahaneden arzu edenler beheri için ayrıca üç kuruş posta ücreti zam etmelidir. Yirmi ve kırk kuruşluk nevden iştira eden zevatın esamisi ilan olunacaktır.

Rahmetullahi Aleyh

Dilir-i şehir-i şehadet-emel, şehid-i mübeccel Abdülezel Paşa merhumun bir tasviriyle tezyin-i ser-sahife-i iftihar etmek Servet-i Fünûn’un en kıymetli arzusu olduğu halde şimdiye kadar buna destres olamayışını büyük bir noksan-ı muvaffakiyet sayıyor ve pek ziyade müteessif oluyorduk. İşte bugün o noksanı ikmal ile nazargâh-ı kariin-i kirama bizzat besalet ve celalet-i Osmaniyemizin timsal-i celilü’ş-şanı ve nam-ı namîsi tarih-i fütuhat-ı âlemin nakş-pirayı sahayif-i cavidanı olan şehit müşarunileyhin nurani sima-yı salabet-i intimasından bir zıll-i mütekasif arzına muvaffak oluyoruz.

(…)

-Fi 29 Nisan 313-