Saydü’l-edvar ve menşe-i bedayi-i asar olan devr-i bülend-i hazret-i hilafet-penahide uyun-ârâ-yı fahr ve şükran olmakta bulunan müessesat-ı nafia-i medeniyeye bir lahika olmak üzere Konya’da küşadına müsade-i seniyye-i cenab-ı mülükâne şeref erzan buyurulmuş olan halı sergisi yümni-i teali işbu Nisan’ın yirmi birinci Cumartesi günü küşat olunmuştur. İşbu sergi Haziran’ın onuna kadar devam edecektir.

Nefais-i mensucat-ı dâhiliyemizden madud olan halı seccade ve kilim gibi eşyanın nazargâh-ı umuma vaz ve teşhir ve bu sanat-ı nefisenin tamimi için efkâr-ı ahalide bir hiss-i müfid-i rağbet ve rekabet uyandırmak maksadıyla müesses bulunan bu sergiye evvelce her tarafa vuku bulan tebligat ve teşvikat üzerine gerek mülhakat-ı vilayetten ve gerek vilayat-ı mütecavereden birçok eşya-yı mütenevvia geldiği gibi temin-i intizamına da vilayetçe suret-i mahsusada sarf-ı mesai ve gayret edildiği cihetle saye-i terakki-vaye-i hazret-i şehriyâr-ı azimide memalik-i mahruse-i şahane dahilinde ilk defa olarak Konya’da açılacak olan bir meşherin fevkalade mazhar-ı muvaffakiyet olacağına eminiz.

(…)

Beşinci Kitap

-Roman-

Hayal İçinde

Muharriri: Hüseyin Cahit [Yalçın]

Ahiren intişar eylemiştir.

Fiyatı Dersaadet için 6, taşra için taahhüt ücretiyle beraber 8 kuruştur.

(İzmir’de kitapçı Talat Efendi’nin dükkanında satılır.)