Resimlerimiz

“Kıraat-i Ferman-ı Alişan”

Bağdat vilayet-i celilesine keyfiyet-i tayinlerini mükemmel tercüme-i hâlleri ve tasvir-i âlileri ile beraber 282 numaralı nüshamıza derç ettiğimiz devletlü Ataullah Paşa hazretlerinin vilayet-i müşarünileyhe icra-yı memuriyetlerini natık-ı ferman-ı alişan müşarünileyhin Bağdat’a muvasalatları üzerine ahiren ihtifalat-ı layıka ile hükümet konağı pişgâhında kıraat olunmuş ve bu resm-i behini irae eden bir kıta fotoğrafı mahallinden idaremize tebliğ kılınmış olmakla suret-i mahsusada hakkettirilerek ilk sahifemizde vaz-ı mevki-i ihtiram edilmiştir.

“Berat Şehri ve Berat’ta Hanende Kızların Kıyafetleri”

Berat şehri malum olduğu üzere Yanya vilayeti dâhilinde merkez-i liva olan büyük kasabalardandır. Şehir esasen dört kısma münkasım olup resmimiz yalnız bir mahalleyi irae ediyor. Bu kısım kasabanın en latif ve ciyadet-i havasıyla en mümtaz mahallidir. Diğer cihetler umumiyetle ağaçlık ve kapalı olduğundan havaları bittabi o kadar haiz-i ciyadet değildir. Kasaba esasen bir boğazda vaki ve ahalisi on iki bin nüfusu mütecavizdir.

(…)

“Prens dö Napel [de Naples] ve Nişanlısı”

Prens dö Napel ile Karadağ prensinin küçük kerimesi Prenses Elen’in [Elena] izdivacı maddesi artık kesb-i katiyet ve resmiyet eylemiştir. Resm-i izdivacın teşrinievvel-i efrenci içinde icra olunacağı memul olmakla beraber elyevm seyahatte bulunan Rusya çarı hazretlerinin Fransa’dan geçerek İtalya’ya gelebileceği bir zamana tesadüf etmek üzere muayyen bir gün tayin edilmemekte olduğunu bazı evrak-ı havadis yazıyor. (…)