Bu hafta resim sayfalarımızı Adana’da müceddeden derdest-i inşa olan daire-i hükûmetin vaz-ı esas resmi ile Ergani Madeni’nde vücuda getirilen asar-ı umran tezyin eyliyor.

Memalik-i şahanenin cihat-ı muhtelifesinde anbean tecelli eden bu gibi masir-i himmet ve mamuriyete temdid-i nazar ettikçe mesrur ve müteşekkir olmamak mümkün değildir. Hemen her gün bir cami-i şerif, bir mektep, bir kışla, bir köprü, bir daire-i hükûmet, hâsılı hayır ve umrana delalet eder yeni bir eserin hiz-ara-yı husul olduğu görülüyor. Sayfalarımızın zaman zaman bunların resimleriyle pirayedar olduğunu görmek, bilmezsiniz, bizde ne büyük bir meserret husule getirir.

Ergani Madeni’nde yapılan minare ve saat kulesi hakikaten nazar-rübadır. Hususuyla kulenin tarz-ı inşasındaki zarafet ve letafet, bunun zevk-aşina bir sahib-i himmet elinden çıkmış olduğuna delalet ediyor.

(…)

Muharrir-i edibimiz Tevfik Fikret Bey’in asar-ı manzumesinden bir kısmını havi olarak matbaamızda tab ve neşredilmiş olan Rübab-ı Şikeste’nin ikinci tabı da geçen hafta içinde hitam bularak, tevzi edilmeye başlamıştır.

Fiyatı yedi buçuk kuruş olup taşra için yüz para posta ücreti zamm olunur.

[İmza: Vafiadis]

[İmza: Vafiadis]