Mahkeme-i temyiz aza-yı kiramından atufetlü Ali Şehbaz Efendi hazretleri tarafından gazetemize mahsus olarak Dreyfus meselesinin cihat-ı hukukiye ve adliyesi hakkında yazılmış olan makaleyi derke dercile kesb-i fahr ederiz:

Bir müddetten beri Dreyfus meselesi her memlekette fikirleri meşgul etmektedir.

Dreyfus aleyhine lâhık olan hükümde isabet olup olmadığı ciheti mevzu-ı bahis bulunmak hasebiyle Fransa’da bu hususun bais olduğu kıl ü kal ve endişe esasen makul görülebiliyor ise de mahkemelerin lâyuhti olmamasına ve hükkâmın dahi sair insanlar gibi sehiv ve hatadan masun ve azade bulunmamasına nazaran nice nice eşhasın bila-mucip duçar-ı mücazat edilmiş oldukları muahhiren zuhur eden ahval ile nümayan olduğu halde hiçbir vakit keyfiyetin şu işte müşahede olunan ehemmiyet-i fevkaladeyi kesp etmediği calib-i nazar-ı dikkattir. Hatta miladi on sekizinci karnda Kalas’ın (Calas) Volter tarafından ve yüz sene mukaddem Lizörk’ün [Lesurque] müşahir-i vükelâ-ı daavî canibinden badelidam tashih-i mahkûmiyetleri yolunda kemal-i keremi ve belagatla vukua götürülen say ve gayret ve teşebbüsat bile bu derece tahdiş-i ezhanı badi olmamıştı. (…)

Miladi 1894 sene-i evahirinde yani bundan üç buçuk sene mukaddem Fransa erkân-ı harbiye yüzbaşılarından Harbiye Nezareti maiyetinde müstahdem Alfred Dreyfus’un tertibat ve tensikat-ı askeriyeye müteallik birtakım evrak-ı mühimme-i mahremane suretlerini bir ecnebi devlete teslim eylediği hakkında Fransa matbuatında zuhur eden şayia Fransızları azim-i halecana düçar etmişti. Almanya ile mabeynlerinde vuku bulan muharebedeki mağlubiyetlerini başlıca Prusya devletinin memleketlerine sevk eylediği eşhasın ihbaratına hamledegeldiklerinden Fransızlar serair-i askeriyenin hüsn-i muhafazasını mesail-i hayatiyeden addetmektedirler. (…)