1307 senesi Mart’ında birinci nüshası neşrolunmuş olan Servet-i Fünûn şimdiye kadar güzar eden üç yüz on iki haftada tamam üç yüz on iki nüsha neşrederek -bi-lutfihi teala- bugün üç yüz on üç numaralı adedini pişgâh-ı erbab-ı mütalaaya takdim ile yedinci sene-i intişariyesine duhule muvaffak oluyor. Altı seneyi itmam eden müddet-i mevcudiyetimizde irae edebildiğimiz ıttırat -ki mahza müşahedesiyle minnettar olduğumuz rağbet ve teşvikin mahsulüdür- neşriyat-ı müstakbelemiz için dahi üssü’l-esastır.

Geçen ve evvelki seneler, yine böyle cilt başı olmak vesilesiyle yazdığımız mukaddimelerde beyan eylediğimiz üzere Servet-i Fünûn bidayet-i intişarında altı yüz nüsha basmakla başlayıp tedricen nail-i terakki olarak geçen sene 1800 adedi bulmuştu. Bu defa yedinci sene nüshalarına iki bin yüz adet tab ile mübaşeret eyliyoruz. Altı seneyi ikmal eden hayat-ı neşriyatımızda matbuat-ı Osmaniye’nin hiçbirine müyesser olmamış bir ıttırad-ı fevkalade irae edişimiz, yani bila-inkıta ifa-yı vazife-i neşriyeye muvaffakiyetimiz nasıl mucib-i iftiharımız ise mürur eden şu seneler zarfında, cüzi fakat tedrici ve daimi bir surette müşahede eylediğimiz rağbet-i mütalaanın da o derece minnettarıyız.

Servet-i Fünûn rağbetin en büyük kısmını vilayat-ı şahane erbab-ı mütalaası tarafından görmekte olduğundan naşi ilan-ı minnettarı sırasında bu ciheti beyan ve tasrih etmek isteriz:

Elyevm 2100 adet tabımızın suret-i sarfı bervech-i atidir:

Adet 1290 vilayat-ı şahane aboneleri

144 memalik-i ecnebiye

400 Dersaadet’te nüsha nüsha satılan

106 Dersaadet aboneleri

160 koleksiyon nüshaları

Ceman adet 2100

Derç eylediğimiz şu istatistik idaremiz kuyuduna tamamen mutabıktır. Namus ve istikamet dairesindeki meslek-i müttehazımız bizi daima irtikâb-ı kizbden men eylediği için aded-i neşriyatımızı, birkaç kat fazla ilan etmek gibi gülünç hareketleri hiçbir zaman tecviz eylemedik.

Mesela bâlâdaki erkamdan vilayat irsalatının sıhhatini ispat etmek için postane kuyuduna müracaat kâfidir. İdaremize nakit makamında varit olan pullar sarf olunduktan sonra 1312 senesi zarfında postane-i amire veznesinden ba-defter otuz altı bin kuruşluğu mütecaviz pul mübayaa olunmuştur ki şu hesapça Servet-i Fünûn mevcudiyet-i naçizanesiyle postane-i amireye şehrî otuz liradan ziyade varidat veriyor demektir.

İstatistikimize atf-ı nazar ile vilayat-ı şahane erbab-ı mütaalası tarafından Servet-i Fünûn’un mevcudiyet-i maddiyesine edilen hizmet derhâl takdir olunur zannederiz. Binaenaleyh taşra müşterilerimizin temin ve  tezyid-i memnuniyetleri için elimizden geleni icrada tereddüt eylemediğimiz gibi abonelerimiz tarafından beyan olunacak mütalaaları dahi fevkalade bir ehemmiyetle telakki ve kabil-i tatbik olduğu hâlde derhâl icra eyleyeceğiz. Bu kabîlden olarak ahiren mevrut birkaç mektupta beyan edilen arzuya tevfik-i hareketle kısm-ı siyasimizde ziraat ve ticarete ait malumatı ve Bursa havadisini tevsi-i derç ile badema demir yolu kuraları cetvelini amortisman numaralarıyla beraber tekmil neşredeceğiz. Kezalik postanelere tevdi olunan nüshalarımız şimdiye kadar adi kâğıda sarılmakta ve bunlar yolda yırtılarak gazeteler zedelenmekte olduğu için badema nüshaları bilhassa Avrupa’dan celp eylediğimiz yırtılmaz bir kâğıt derununda göndermeye başladık. Zaten yolda zayi olan nüshaları talep vukuunda tekrar yine irsal eyliyoruz.

Gazetemizin vilayat-ı şahanece olan hizmetini teshil ve tevsi etmek üzere varid-i hatır olacak mülahazatın idarehanemize bildirilmesini taşra kariin-i kiramından bilhassa rica ederiz. Vilayattan şehir menazırına, inşaata ve kıyafet-i mahalliyeye müteallik olarak gönderilecek fotografilerin maatteşekkür gazeteye derç olduğunu burada tekrar Servet-i Fünûn’un resimleri menafi-i memleket ve münasebet-i vakayi gözetilerek intihap kılındığını, bu bapta -şimdiye kadar yaptığımız vechle- gazetemize tasvirleri derç olunan veya idaremize fotografiler gönderen zevat-ı kirama teşekkürden başka beyan eyleyecek bir şeyimiz olmadığını ve resimlerin dercinden naşi hiçbir ücret veya masraf mutalebe edilmediğini ifade ve ihtar eyleriz.

İşte Servet-i Fünûn vazife-i neşriyesine ve meslek müttehazına müteallik tafsilat-ı lazımeyi ita eyledi. Her zaman nailiyeti ile mübahi bulunduğu rağbet ve teşvikat-ı umumiyenin yedinci sene-i intişariyesinde dahi devam eyleyeceğinden emin olarak hizmet-i daimesine şüru eyliyor. Ve minallahi’t-tevfik…

Gazetemiz resimlerinin nefaset ve zarafet-i sanatkâranesini temin etmek maksadıyla kalıplarımız ya bilhassa Viyana’da imal ettiriliyor yahut Paris’ten celp olunuyor. Bundan dolayı bazı levhalarımız istenildiği zaman yetişemeyerek bir hafta sonra derç ve neşredilmektedir. Temin-i nefaset uğrunda vukua gelen bu tehiratın mazur tutulacağından eminiz.

Eyyam-ı mesude-i ıydı geçirdik. Mübarek bayram pazar günü ikindi ezanıyla bizlere veda ederken üç gün müsait bir hâlde küşada devam eden hava dahi bozuldu. Denizimizi Haliç’e dalgalandırmış olan lodos -gözü yaşlı olur derler ya- âdeti üzere yağmuru getirdi. Lakin o yağmur bayramın birinci gecesi de yağıp sokakların yazdan numune gibi son derece ziyadeleşmiş tozunu bastırmamış olsaydı ziyarat-ı ıydı icra edenler için her gittikleri yerde uzun uzun durulup temizlenmek, yollarda dumandan dört adım ilerisini görmemek lazım gelecekti.

Şubat içinde böyle tozdan kuraktan hatta bazen sıcaktan bahsediş tuhaf oluyor değil mi? Bu sene mevsim-i şitayı kıştan saymasak hemen yeri var. Bilmem soğuk gördük mü? Teşrinisanide birkaç günler irae-i çehre-i barit eden kardan, soğuktan sonra havalarımız hep müsait gitti. Hele Ramazan pek tatlı geçti.

Ramazanın tatlı eyyamını bayramın tatlı şekerleri vely etmişti. Onu da her vakit olduğu gibi meşagil-i mutade takip eyledi. Allah nice senelere yetiştirsin duasını edip işimize bakalım.

(…)