Gazetemizin geçen hafta 360 numaralı nüshası kâmilen sarf olunduğu cihetle matbaamızda hiç mevcudu kalmamıştır. Hâlbuki zamanında almamış olan bazı müşterilerimiz idaremize müracaatla bu numaradan istiyorlar. Gazetemizi alıp da koleksiyon halinde muhafaza etmeyen zevat-ı kiram mezkûr 360 numaralı nüshayı bade’l-mütalaa matbaamıza gönderirlerse yerine başka nüsha veyahut bedeli takdim olunacaktır. Birkaç defalar ihtar eylediğimiz gibi yine beyan ederiz ki gazetemize abone olmayanlar veyahut yevm-i intişarında mübayaa etmeyenler daima böyle arızalara müsadif olabilirler. Binaenaleyh her nüshayı muntazaman almak için en salim tarik abone olduğunu tekrar eyleriz.

Ramazan-ı gufran-nişan – İftar – Mekûlat – Yumurtanın havass-ı gıdaiye ve kuvve-i hazmiyesi – Tatlılar – Baharlar – Tuz, Karabiber – Karanfil, Tarçın – Turşular, Ekşiler – Baharların nef’i ve zararı – Mevsim-i şitada ramazan – Mevsim-i şita ramazanında mekûlât ve meşrubat.

Ramazan-ı gufran-nişanda gündüzleri ibadat ve taat ile meşgul olan halk akşama doğru iftarı düşünür, emr-i rabbaniyi ifa etmek üzere ezana kadar nefsini mahrum ettiği mekûlat ve meşrubatı tedarik eder, iştiha-aver bir surette tanzim ve tertibe çalışır; bu da günah değildir.

(…)

Sofra adabından iftarın şerafetinden bahsetmek bizim salahiyetimiz dâhilinde değildir. Zeytin tanesiyle bozulan orucu müteakip pastırmadan, peynirden, tatlılardan mürekkep iftariyeden ve türlü türlü simitlerden alınan lokmalara da karışmak istemeyiz. O bir âdettir, âdet-i milliyedir, milliyet tatlıdır.

(…)