“Köprüler”

İki köprü kadar birbirine müşabih ne olabilir? Halbuki muhtelif memleketlerin muhtelif medeniyetlerine atf-ı nazar edilecek olursa bazen adi bir geçitten, bazen kalesiyle, istihkâmıyla koca bir şehirden ibaret olan köprülerin şeklen pek ziyade değiştiği görülür. Şüphesiz bu tebeddülatın en birinci sebebi hayat-ı içtimaiye ve siyasiyedeki tahavvüllerdir. Fakat köprü inşası için lazım olan mevadd-ı asliye tenevvü ettirilmemiş olsa idi fen ne kadar terakki ederse etsin bundan bir netice-i hasene istihsal olunamazdı. 

“Hayat-ı İlmiye, Edebiye ve İçtimaiye” 

 Tasarruf ve iktisat. – Figaro gazetesi Mösyö Başlo namında bir zatın Fransa maliye nezaretine verdiği bir layihadan bahsediyor. Layihanın münderecatı halkı tasarruf ve iktisada saik olduğu cihetle bittabi kemal-i ehemmiyetle telakki edilmeye şayandır. Çünkü tasarruf ve iktisat bir ailenin, bir ferdin hîn-i hacette en büyük yardımcısıdır. İnsan, ne kadar refah-ı maişet sahibi olsa günün birinde paraya muhtaç oluverir. Birikmiş parası olmazsa lirasına ayda beş kuruş faiz vermeyi göze aldığı halde bile maksadına pek güç nail olur. Bunun için tasarruf ve idare adeti aramızda en ziyade yerleştirilmesine çalışılacak bir güzel usuldür. Avrupa’da halkı tasarrufa sevk için türlü türlü vasıtalar bulunduğu halde bunlarla iktifa etmeyerek işi daha kolaylaştırmaya, daha kabil-i icra bir hale getirmeye çalışıyorlar. Mösyö Başlo’nun layihası da bu maksadı temine hadim olacaktır. Esas pek sade: Mösyö Başlo Paris’in sokaklarına, tensip ettiği mahallerine Fransa’nın her tarafına birer makine yerleştirecek.

(…)