Matbaamızın bu defa Babıali caddesindeki mahall-i mahsusa hin-i naklinde gazetemizin nesh-i kadime ve zaidesi paketlerinden biri her nasılsa sirkat olunarak bu hafta birtakım çocuklar eline geçip satılmakta olduğu görülmüş ve cümlesi derhal toplattırılarak mütecasiri hakkında muamele-i kanuniyeye ibtidar olunmuş olmakla gazetemiz nüshalarının fiyat-ı mevzuası hiçbir zaman tahavvüle uğratılmadığı ihtar ve ilan olunur.

Hasılatı evlad-ı şüheda ve malulin-i guzat-ı Osmaniye’ye mahsus olmak üzere ceride-i acizanemiz tarafından bir nüsha-i mümtaze tabına mübaşeret edildiğini yazmıştık. Nüsha-i mümtazemiz eazım-ı üdeba ve meşahir-i muharririnin bilhassa kaleme aldıkları otuz parçaya karib manzum ve mensur eserden müteşekkil bulunuyor. İşbu asar-ı nefiseye mahsus olarak tersim ve hakkettirilen levhaların dahi mükemmeliyetine fevkalade itina edilmekte olduğundan nüsha-i mümtazemiz bihakkın enafis-i asardan madut olacaktır demekte tereddüt etmeyiz.

Nüsha-i mümtazemizin hin-i tertibinde lutf-ı muavenetlerine müracaat eylediğimiz meşahir-i erbab-ı kalem ve sanat tarafından gördüğümüz teveccüh ve himmetin cidden minnettarıyız. Cümlesine takdim-i teşekkürat eyler ve bu meyanda Viyana resm-i levhaları fabrikatörü Mösyö En[…]’in dahi nüsha-i mümtazemiz resimleri için fiyat-ı mukarrere üzerinden yüzde elli tenzilat icra ederek ibraz-ı müessir-i fütüvvet ve hakkımızda irae-i muhabbet etmiş olduğunu kemal-i memnuniyetle ilan ederiz.

Nüsha-i mümtazemiz iane sergi-i alisi komisyonunun mezuniyeti ve maarif nezaret-i celilesinin ruhsatnamesi ile tab olunmakta olup beminnehulkerim gelecek pazartesi günü neşrolunacaktır.

Nüsha-i mümtazemiz, Servet-i Fünûn’un nısfı hacminde ve takriben yüz elli sayfadan müteşekkil olacak, elliyi mütecaviz tesavir-i nefiseyi de havi bulunacaktır. Nüshayı iki nevi kâğıt üzerine tab eyliyoruz; birinci nevi kâğıtlısına on beş ve ikinci nevi kâğıtlısına on kuruş fiyat vaz edeceğiz. Taşradan arzu edenler beher nüshaya iki kuruş posta ücreti ilave etmelidir.

Posta pulu kabul olunur.

İştira eden zevat-ı kiramın esamisi ber-mutad ilan kılınacağı gibi nüshaları dahi postane-i amirenin itina-yı mahsusu ile ve kemal-i takayyütle gönderilecektir.

Girit muhtacin-i İslamiyesi için Tercüman-ı Hakikat refikimizle müştereken neşr eylediğimiz nüsha hakkında kariin-i kiramımız tarafından ibraz buyurulan tergibat ve teşvikat-ı mahsusanın evlad-ı şüheda ve malulin-i guzat-ı Osmaniye menfaatine intişar edecek olan işbu nüsha-i mümtazemiz için dahi – maziyadetin – tecelli eyleyeceğinden emin bulunuyoruz.

Nüsha-i mümtazemiz hakkında vilayet-i şahaneden pek çok eser teveccüh ve rağbet irae olunarak şimdiden hayli zevat iştirak eylemiş olduğundan bugünkü nüshamızın kısm-ı siyasisinde lütfen nüsha-i mümtazeden iştira eden zevatın esamisi ilan edilmeğe başlanmıştır.

Peyderpey yazılacak zevat-ı kiramın esamisi gazetemizde ilan edileceği gibi nüshalar yevm-i intişarında hemen postaya tevdi kılınacağından irsalatta kat’a teehhür ve adem-i intizam müşahede olunmayacaktır.

(…)

Mehd-i medeniyet ve kurun-ı atikadan beri matmah-ı nazar-ı âlem olan ve zamanımızda İngiltere hükûmetinin yed-i idaresinde bulunarak hükûmet-i müşarünileyhanın kuvvet ve miknetine, meslek-i siyasisine tesiri itibarıyla bütün Avrupa ve bilhassa Rusya erbab-ı siyasetinin nazarından bir an dûr kalmayan Hindistan, bir iki aydan beri şimal-i garbî hududunda zuhura gelen iğtişaşat ve mevaki-i muhtelifesinde ve hatta en müterakki ve medeni şehirlerinde İngiltere idaresinden adem-i hoşnudî izhar eder yolda vaki olan harekat sebebiyle bütün cihan-ı medeniyetin enzar-ı dikkatini calip olmuş ve Hindistan vukuatı siyasiyyun ile evrak-ı havadis tarafından hangi nokta-i nazardan tetkik edilirse edilsin haiz-i ehemmiyet görülmüştür.

Siyasi nokta-i nazardan meseleyi muhakeme edenler vukuat-ı ahireyi İngiltere’nin Hindistan’da iltizam eylediği meslek-i tecavüzkâranenin netayicinden addetmektedirler. İngiltere hükûmeti bittabii Hindistan’da hüküm ve nüfuzunu bir kat daha kuvvetlendirmek fikriyle Afganistan’a kadar – belki Afganistan’ı da – küçük hükûmet ve kabileleri İngiltere’nin daire-i itaatine dâhil etmek, taht-ı nüfuzuna almak ve bunun neticesi olarak Hindistan’ın tekmil hudud-ı şimaliyesini gayr-ı kabil-i mürur bir Sedd-i Çin haline getirmek yolunu ihtiyar eylemişti. Bu politikanın icraatına yirmi sene kadar evvel Başvekil Lord Bikonsfild’in [Lord Beaconsfield] evamir ve talimatıyla Hindistan Valisi Lord Liton [Lord Lytton] başlamıştır. Bu politikanın tatbikatı sebebiyle vaktiyle İngiltere ile Afganistan arasında da muhasamat yüz göstermiş ve hatta bir muharebe bile zuhura gelmişti. Bu muhasamat ve mücadelenin neticesi olarak İngilizler Afganistan’dan Hint ve Afgan hududu üzerinde bulunan kabailin İngiltere nüfuzu altında bulunduğuna dair yazılı ve tasdikli bir söz almışlardır.

(…)